Sulmi në Vjenë: 3 të vrarë dhe 15 të plagosur

EPA/CHRISTIAN BRUNA

Njerëz të armatosur hapën zjarr të hënën mbrëma në Vjenë, derisa banorët e qytetit ishin duke shijuar natën e fundit para se qyteti të hynte në një bllokim të pjesshëm të koronavirusit.

Përmes Twitterit, Policia bën të ditur se 3 njerëz janë vrarë. Bëhet fjalë për dy burra dhe një grua që kanë vdekur pasi që janë qëlluar me armë zjarri. Ndërsa 15 u plagosën, thanë autoritetet herët të martën, ndërsa disa persona të armatosur mund të jenë akoma të lirë.

Të paktën një nga autorët u qëllua dhe u vra nga policia, raporton Euronews, përcjell Albinfo.ch.

Duke folur derisa sulmet ishin ende në zhvillim, Kancelari i Austrisë, Sebastian Kurz, e përshkroi incidentin si “një sulm të neveritshëm terrorist”.

“Një nga autorët ishte neutralizuar, por disa autorë të veprës duket se janë akoma të lirë”, tha Kurz.

“Duket se ata gjithashtu, me sa dimë, janë të pajisur shumë mirë, me armë automatike. Pra, ata ishin të përgatitur shumë mirë”, u shpreh kancelari austriak.

Një dëshmitare e sulmit, Eveline, i tha AP se ajo dhe të tjerët ishin strehuar në një hotel lokal. “Papritmas filloi të shtënat, në fillim nuk e dinim se çfarë ishte… Pastaj kishte përsëri të shtëna, por më afër, kështu që ne filluam të iknim”, tha ajo.