Si do të mbështesë Zvicra klubet sportive të dëmtuara nga pandemia

Në rregulloren e tij të re Covid-19 për sportet ekipore, Këshilli Federal ka përcaktuar "udhëzimet për trajtimin" e kredive me vlerë prej 175 milionë frangash në vit

Qoftë në futboll, në hokej mbi akull apo në sporte të tjera: klubet sportive vuajnë masivisht për shkak të detyrimit për të luajtur pa praninë e publikut, shkruan srf.ch.

Ndërkohë që Këshilli Federal ende nuk ka ndarë konkretisht ndonjë shumë për kompensimin në lëmin e sportit, ai ka udhëzuar Departamentin e Mbrojtjes, Mbrojtjes Civile dhe Sportit (VBS) të hartojë një “letër diskutimi” në këtë drejtim, deri në dhjetor.

Për më tepër, në rregulloren e tij të re Covid-19 për sportet ekipore, Këshilli Federal ka përcaktuar “udhëzimet për trajtimin” e kredive me vlerë prej 175 milionë frangash në vit, transmeton albinfo.ch.

Ajo hyn në fuqi më 1 dhjetor dhe zëvendëson dispozitat e mëparshme për financimin e sporteve.

Këto janë kushtet që duhen plotësuar:

Qeveria Federale mund të mbështesë klube individuale drejtpërdrejt me kredi pa interes që arrijnë deri në një të katërtën e shpenzimeve të tyre operative që kanë pasur në sezonin 2018/2019.

Klubet duhet të sigurojnë kolateralin (mbulesën) në shumën prej 25 për qind të huasë.

Ato klube që nuk mund të paguajnë paratë brenda tri viteve duhet të ulin pagat e tyre me një maksimum prej një të pestës.

Klubet kanë maksimalisht dhjetë vjet për të shlyer huatë.

---