Veteranët e luftës paralajmërojnë protestë pas aktakuzave ndaj ish krerëve të UÇK-së

Foto ilustrim

Ushtruesi i detyrës së kreut të Organizatës së Veteranëve të Luftës së UÇK-së, Faton Klinaku, në një konferencë për media ka njoftuar se këshilli drejtues i kësaj organizate ka vendosur për organizimin e një proteste.

Për datën se kur do të mbahet protesta pritet të vendoset ditëve në vijim, ndërsa thirrja për protestë vjen pas zhvillimeve në vend.

Klinaku ka thënë se protesta do të jetë paqësore duke respektuar rekomandimet e Institutin Kombëtar të Shëndetësisë Publike të Kosovës për parandalimin e përhapjes së koromavirusit.

“Kryesia e diskutoi këtë situatë. Kemi pasë takime me deputetët e Kuvendit të Kosovës. Vendosëm të organizojmë protestë. Për datën ju informojmë me kohë, por mund të konfirmoj që edhe nesër e kemi mbledhjen e këshillit drejtuyes, ku do të diskutohet për protestën”, tha Klinaku në një konferencë për media.

Ish-presidenti Thaçi, teksa ka njoftuar sot për aktakuzën e konfirmuar dhe dorëheqjen ka bërë thirrje që të mos organizohen protesta, raporton Albinfo.ch.