Bie numri i infeksioneve por shënohet rekord i vdekjeve nga Kovidi: 107

Numri i rasteve ishte 5.980. Shkalla mesatare në 7 ditët e fundit, e rasteve të rezultuara pozitive aktualisht është 26.5 për qind.

Zyra Federale e Shëndetit Publik ka raportuar 5.980 raste të reja që kanë rezultuar pozitive për virusin corona në 24 orët e fundit.
Kjo e bën mesataren e 7 ditëve në 7290 që është 9 për qind më pak se në javën e kaluar, njofton srf.ch.

Trendi, ndonëse është në rënie, është ende në një nivel shumë të lartë, transmeton albinfo.ch.

Shkalla mesatare në 7 ditët e fundit, e rasteve të rezultuara pozitive aktualisht është 26.5 për qind. Kjo do të thotë se nga 100 teste, mesatarisht 26 teste ishin pozitive.

Numri i testeve të bëra, në një mesatare 7-ditore është 29,626 teste në ditë, që është 5 për qind më pak se javën e kaluar.

BAG raporton 107 vdekje të reja nga Covid-19, përcjell albinfo.ch. Numri i rasteve të vdekjes është dukshëm më i lartë se ai i regjistruar deri më tash (72).

Ndërkohë, të gjitha kantonet së bashku raportojnë 3769 njerëz që po trajtohen në spitale për Covid-19. Kjo është 15 për qind më shumë se në javën e kaluar.

---