Franca, vendi i parë evropian me dy milionë të infektuar me COVID-19

(Claudio Furlan/LaPresse via AP)

Franca të martën u bë vendi i parë evropian që kapërceu 2 milionë raste me koronavirusin, pavarësisht nga një bllokim mbarëkombëtar i 30 tetorit që ka çuar në një rënie të mprehtë të infeksioneve të reja, sipas Reuters, përcjell albinfo.ch.

Franca është e katërta në numrin e infeksioneve të raportuara, me 2,036,755, pas Shteteve të Bashkuara, Indisë dhe Brazilit.

Me një numër vdekjesh që kalon 45,000, Franca renditet e shtata në vdekjet me COVID-19 globalisht. Evropa ka raportuar gati 14.5 milionë raste COVID-19 deri më tani, duke e bërë atë rajonin më të prekur në botë dhe duke përbërë më shumë se 26% të të gjitha infeksioneve deri më tani, sipas vlerësimit.

Qeveria e presidentit Emmanuel Macron ka vendosur një objektiv që nga 1 dhjetori t’i japë fund bllokimit, megjithëse mund të zgjatet nëse numrat nuk bien aq shpejt, përcjell tutje albinfo.ch.