Gjermania do të kompensojë ushtarët homoseksualë që u përballën me diskriminim

Qeveria e Kancelares Angela Merkel të mërkurën ra dakord për një projekt-ligj që do të dëmshpërblejë ushtarët homoseksualë që u përballën me diskriminim në forcat e armatosura mes vitit 1955 dhe 2000.

Sipas ligjit të propozuar, i cili duhet të miratohet nga Parlamenti, ushtarët të cilët u dënuan nga gjykatat ushtarake  pse ishin homoseksualë, të ulur në gradë ose që ndryshe panë karrierën e tyre të dëmtuar për shkak të orientimit të tyre seksual, do të merrnin një “shumë simbolike” prej 3,000 €.

“Ne nuk mund të fshijmë vuajtjet e shkaktuara ndaj këtyre njerëzve”, tha ministja e Mbrojtjes, Annegret Kramp-Karrenbauer, për gazetën RND, përcjell albinfo.ch.

Kompensimi do të vlente për ushtarët nga Bundeswehr, që ishte krijuar në Gjermaninë Perëndimore në vitin 1955, dhe për trupat nga ish-Gjermania Lindore, nga Ushtria Kombëtare e Popullit, e themeluar në vitin 1956.

Ministria e Mbrojtjes vlerëson se rreth 1.000 njerëz do të kishin të drejtë për një pagim. Vendimet e Gjykatës Ushtarake kundër ushtarëve për përfshirje në akte seksuale homoseksuale konsensuale do të anulohen gjithashtu sipas projekt-ligjit, përcjell tutje albinfo.ch.