Shteti evropian që hyn në izolim 5-javor

Kryeministri i Holandës, Mark Rutte, tha se vendi i tij do të futet në izolim për pesë javë, për të frenuar përhapjen e koronavirusit.

Nga e mërkura të gjitha dyqanet me artikuj jothelbësorë do të mbyllen. Dyqanet ushqimore, bankat dhe farmacitë do të mbeten hapur.

Parukeritë, muzetë, teatrot, tregjet e Krishtlindjeve, kazinotë, parqet zbavitëse, palestrat dhe pishinat do të mbyllen po ashtu, transmeton express, përcjell Albinfo.ch.

Nga e mërkura do të mbyllen edhe shkollat fillore dhe të mesme. Këto masa do të zgjasin deri më 19 janar.

Të hënën, Holanda regjistroi 8,496 raste të reja me koronavirus – pak më shumë se mesatarja javore.

Derisa Rutte iu drejtua kombit, protestuesit që kundërshtojnë masat e izolimit mund të dëgjoheshin jashtë Parlamentit.

Holanda, në total, ka regjistruar mbi 632,000 raste me koronavirus. Prej tyre, mbi 10,000 pacientë kanë humbur jetën.

Në gjithë botën, numri i të infektuarve ka kaluar 72 milionë.

Mbi 1.6 milion kanë vdekur dhe mbi 47 milionë janë shëruar.