Zvicra ndalon fluturimet nga Britania e Madhe për shkak të virusit të ri

Ky vendim është marrë për shkak të mutacionit të ri, shumë ngjitës të koronavirusit, që është paraqitur në Britaninë e Madhe dhe në Afrikën e Jugut

Zyra Federale e Aviacionit Civil (Bazl) ka marrë vendimin që, duke filluar nga mesnata e sotme të ndërpresë lidhjet e trafikut ajror me Britaninë e Madhe dhe Afrikën e Jugut, shkruan srf.ch.

Ky vendim është marrë për shkak të mutacionit të ri, shumë ngjitës të koronavirusit, që është paraqitur në dy vendet e përmendura, transmeton albinfo.ch.

Me ndalimin e fluturimit duhet të parandalohet një përhapje e mëtejshme e variantit të ri të virusit.

Në mbrëmje, Bazl ka informuar aeroportet dhe kompanitë ajrore të interesuara, si dhe aviacionin e biznesit, për vendimin e marrë i cili hyn në fuqi menjëherë.

Një numër vendesh evropiane kanë ndaluar ose po shqyrtojnë mundësinë e ndalimit të udhëtimit nga Mbretëria e Bashkuar për të parandaluar përhapjen e variantit më infektiv të koronavirusit.

Në mesin e tyre, sipas BBC, Holanda dhe Belgjika kanë pezulluar fluturimet. Trenat për në Belgjikë gjithashtu janë ndaluar.

---