Gjermania i ofron Rusisë mbështetje në zhvillimin e vaksinave Sputnik

"Përtej të gjitha dallimeve politike që janë aktualisht të mëdha, ne megjithatë mund të punojmë së bashku në një pandemi, në një zonë humanitare", u tha Merkel gazetarëve

Gjermania i ka ofruar Rusisë mbështetje në zhvillimin e vaksinës së saj antikoronavirus Sputnik V, tha të enjten kancelarja Angela Merkel, shkruan “Reuters”, përcjell albinfo.ch.

Autoritetet ruse thanë të mërkurën se kanë aplikuar për regjistrimin e Sputnik V në Bashkimin Evropian.

“Përtej të gjitha dallimeve politike që janë aktualisht të mëdha, ne megjithatë mund të punojmë së bashku në një pandemi, në një zonë humanitare”, u tha Merkel gazetarëve. Në lidhje me aplikimin e Moskës në Agjencinë Evropiane të Barnave (EMA), udhëheqësja gjermane tha se ajo “ka ofruar që Instituti ynë Paul Ehrlich … të mbështesë Rusinë në të”. Instituti Paul Ehrlich është organi rregullator i mjekësisë në Gjermani. “Dhe nëse kjo vaksinë miratohet nga EMA, atëherë mund të flasim për prodhim të përbashkët ose gjithashtu për përdorim”, tha tutje Merkel.

Zhvilluesit e saj kanë thënë që vaksina është më shumë se 90 për qind efektive dhe Rusia nisi fushatën e saj të vaksinimit masiv duke përdorur vaksinimin këtë javë. Fondi Rus i Investimeve Direkte që ndihmoi në zhvillimin e vaksinës, thotë se Sputnik është regjistruar tashmë në një numër vendesh, përfshirë Bjellorusinë, Venezuelën, Bolivinë dhe Algjerinë, përcjell tutje albinfo.ch.

---