Përfundon numërimi i votave me kusht, fillojnë ato të diasporës

Sipas KQZ-së, vota me kusht kanë qenë 31 mijë e 500 vota me kusht dhe rreth 2 mijë e 800 vota të personave me nevoja të veçanta

Komisioni Qendror i Zgjedhjeve ka përmbyllur të hënën në mesnatë procesin e numërimit të votave me kusht dhe mëngjesin e së martës ka filluar me numërimin e votave të ardhura përmes postës.

Vetëvendosje ka marrë 14 mijë e 939 vota nga gjithsej 29 mijë 490, përcjell albinfo.ch.

Zëdhënësi i KQZ-së, Valmir Elezi, ka thënë janë 56 mijë e 610 zarfe me fletëvotime të cilat do të numërohen në QNR.

“Numërimi i votave me kusht, i atyre me postë dhe përfundimi i disa procedurave të tjera në QNR, shënojnë fazën përfundimtare para se Komisioni Qendror i Zgjedhjeve të mund të shpallë rezultatet përfundimtare të zgjedhjeve që u mbajtën më 14 shkurt. Po punojmë maksimalisht që të përmbyllim procesin e numërimit edhe të këtyre fletëvotimeve”, ka thënë ai.

---