Austria dëshiron nga prilli të prezantojë “pasaportën e gjelbër” të vaksinimit

Dan Visan @dsvi

Derisa Komisioni Evropian dëshiron të prezantojë pasaportën e re digjitale të COVID-19 deri më 1 qershor, Austria ka përshpejtuar procesin e prezantimit të të ashtuquajturës “pasaportë e gjelbër”, të cilën dëshiron të prezantojë në prill.

 Austria dëshiron të ketë një dokument në prill që do të përmbajë dëshmi të vaksinimit, një test negativ ose një infeksioni të mëparshëm duke prezantuar antitrupat e siguruar.

“Ne nuk duam të presim prezantimin e “pasaportës” në nivelin evropian”, tha Kancelari austriak, Sebastian Kurz, në konferencën e shtypit pas mbledhjës së Këshillit të Ministrave, shkruan nachrichten.at, përcjell albinfo.at.

Ndërkohë, ministrja e Turizmit, Elisabeth Köstinger, ka thënë të mërkurën se në ditët në vijim do të punohet në kuadrin ligjor për zbatimin e projektit nën titullin e punës “pasaporta e gjelbër”, që u vendos në seancën e qeverisë.

Kjo pasaportë do të lejojë lirinë e udhëtimit dhe do të mundësojë shkuarjen në pushimet verore.

Austria, e cila është një vend, ekonomia e të cilit, ndër të tjera, mbështetet shumë në turizëm, ka iniciuar futjen e pasaportave në BE, domethënë pasaportat që do të mundësonin rivendosjen e lirisë së udhëtimit.