BioNTech: Mund të vaksinojmë shumicën e gjermanëve deri në fund të verës

Keystone 2020

Themeluesi i BioNTech, partner me Pfizer në bërjen e një prej vaksinave të para të koronavirusit që është aprovuar për përdorim, është optimist se virusi do të jetë nën kontroll në shumicën e vendeve evropiane deri në fund të verës.

Qeveritë e Bashkimit Evropian po përballen me kritika për fillimin e ngadaltë të fushatave të tyre të vaksinimit, duke e lënë bllokun të mbetet shumë prapa vendeve të tilla si Izraeli, Britania dhe Shtetet e Bashkuara, shkruan Reuters, përcjell albinfo.ch.

Por, themeluesi i BioNTech, Ugur Sahin, tha se ai ishte optimist që problemet do të rezultonin të përkohshme, duke shtuar se ishte e mundur të sigurohej që 70% e gjermanëve të vaksinoheshin deri në fund të shtatorit.

“Në shumë vende evropiane dhe SHBA ndoshta nuk do të kemi nevojë për bllokime deri në fund të verës”, i tha ai gazetës Welt am Sonntag.

“Do të ketë shpërthime, por ato do të jenë zhurmë në sfond. Do të ketë mutacione, por ato nuk do të na frikësojnë”.