Nga 12 prilli, anglezët mund të pinë sërish një birrë në restorant

Bëhet fjalë për hapjen e të gjitha dyqaneve, palestrave, floktoreve dhe zonave të ushqimit në ambiente të hapura - pubeve - në Angli

Kryeministri britanik, Boris Johnson, konfirmoi rihapjen e planifikuar të ekonomisë për javën e ardhshme. Këtu bëhet fjalë për hapjen e të gjitha dyqaneve, palestrave, floktoreve dhe zonave të ushqimit në ambiente të hapura – pubeve – në Angli, shkruan srf.ch.

Me programin e vaksinimit që po përparon me shpejtësi në të gjithë Mbretërinë e Bashkuar dhe me numrin e infeksioneve që po bie, Anglia do të kalojë në Fazën 2 të planit, duke nisur nga 12 prilli, transmeton albinfo.ch. Pjesët e tjera të Britanisë së Madhe do të vazhdojnë me rregullat e tyre për koronën.

Britanikët nuk do të lejohen të udhëtojnë jashtë vendit të paktën deri para gjysmës së majit. Johnson shpreson që udhëtimet ndërkombëtare do të bëhen të mundshme nga 17 maji, ka thënë ai.

Megjithatë, duke pasur parasysh numrin e lartë të infeksioneve në vendet e tjera, është shumë herët për të marrë një vendim, përcjell albinfo.ch. Ndalimi aktual i udhëtimeve ndërkombëtare do të vazhdojë të zbatohet deri në një njoftim tjetër.

Një sistem semafori do të prezantohet më vonë, sipas të cilit, në varësi të situatës së infeksionit në destinacionin e udhëtimit, do të zbatohen rregulla të ndryshme të testimit dhe karantinës pas kthimit.

---