Aksioni i PSD-së përfundon me arrestime e përplasje me policët

Mediat kosovare shkruajnë se pesë aktivistë të Partisë Socialdemokrate janë arrestuar pas aksionit që të njëjtët kanë pasur te Qeveria e Kosovës. Arrestimi i tyre ndodhi pasi aktivistë të kësaj partie kanë hedhur ngjyrë të kuqe dhe kanë shkruar “Gjakderdhja financiare” në objektin e qeverisë, përcjell albinfo.ch.

Thuhet se arrestimi i aktivistëve të PSD-së u shoqërua me përplasje me zyrtarët policorë, ku këta të fundit kanë përdorur edhe gaz lotsjellës në drejtim të tyre.

Zëdhënësja e PSD-së, Natyra Kuçi, ka konfirmuar për KosovaPress se të arrestuar janë Frashër Krasniqi, Qëndrim Sahiti, Zgjim Hyseni, Nol Nushi dhe Agron Kabashi.

Kryetari i Partisë Socialdemokrate, Dardan Molliqaj, paraprakisht u deklarua për aksionin, ku tha se vetëm me një vendim të qeverisë dhe të Kuvendit janë paguar 11 milionë euro nga buxheti i Kosovës në drejtim të veriut të vendit.

Molliqaj tha se në momentin që Kurti ka pranuar ta vazhdojë dialogun me Serbinë, por edhe pagesa tash, janë dëshmi se edhe kjo qeveri do të jetë avaz i qeverive të kaluara.