BE: Tensionet me Mbretërinë e Bashkuar rrjedhin nga Brexit-i

Tensionet e Bashkimit Evropian me anëtaren e mëparshme, Britaninë e Madhe, nuk janë për shkak të problemeve me protokollin e Irlandës së Veriut të dakorduar nga të dy palët, por vetë Brexit, tha të martën Ursula Von der Leyen.

Ajo deklaroi në një konferencë shtypi, pas ditës së parë të një samiti të BE-së në Bruksel se të 27 vendet anëtare të bllokut ranë dakord se nuk mund të ketë alternativë tjetër për një zbatim të plotë dhe korrekt të protokollit.

“E rëndësishme është të përsërisim se protokolli është zgjidhja e vetme e mundshme për të siguruar paqen dhe stabilitetin në Irlandën e Veriut duke mbrojtur integritetin e tregut të vetëm të Bashkimit Evropian”, shtoi von der Leyen.

“Nëse shohim problemet sot, nuk duhet të harrojmë se ato nuk vijnë nga protokolli, por vijnë nga Brexit, kjo është arsyeja pse problemet janë atje”, përfundoi von der Leyen.