Mancini: Shaqiri, ndër mesfushorët më të mirë në Evropë

Roberto Mancini dhe Xherdan Shaqiri kanë lënë pas krahëve problemet e vjetra

Italia dhe Zvicra përballen të mërkurën nga ora 21:00, në ndeshjet e dyta në Euro 2020.

Trajneri i Italisë, Roberto Mancini ka lavdëruar yllin shqiptar, Xherdan Shaqiri, shkruan albinfo.ch.

“Xherdani për mua është një lojtar i shkëlqyeshëm, ai në Inter bëri atë që duhej të bënte, për fat të keq Interi ishte në ndërtim e sipër dhe ai erdhi nga Bayerni në atë kohë. Por për mua, është një nga mesfushorët më të mirë në Evropë”, është shprehur Mancini.

Roberto Mancini dhe Xherdan Shaqiri kishin bashkëpunuar tek Interi në vitin 2015.

Mancini foli edhe për ndeshjen ndaj Nati-t. “Është një ndeshje e rëndësishme dhe e vështirë, ne e respektojmë Zvicrën, e cila është një ekip kombëtar shumë i fortë që gjithmonë e ka vënë Italinë në vështirësi. Ka lojtarë të mirë dhe me përvojë dhe një trajner që e njeh futbollin tonë. Do të na duhet të zhvillojmë një ndeshje të shkëlqyer”, theksoi trajneri italian.

---