OBSH: Varianti Delta, mbizotërues në pjesën më të madhe të Evropës

Vienna, Austria – Photo by: Jacek Dylag

Varianti Delta i koronavirusit është mbizotërues në pjesën më të madhe të Evropës, njoftoi Organizata Botërore e Shëndetësisë.

“Varianti shqetësues SARS-COV-2 Delta po lëviz me shpejtësi në gjithë Evropën dhe tani është bërë lloji më dominues në pjesën më të madhe të rajonit, bazuar në të dhëna të reja”, lajmëroi OBSH.

“Ai do të vazhdojë të përhapet, duke zhvendosur qarkullimin e varianteve të tjera nëse nuk shfaqet një virus i ri më konkurrues”, u tha më tej nga organizata.

OBSH dhe Qendra Evropiane për Parandalimin dhe Kontrollin e Sëmundjeve (ECDC) ka paralajmëruar se përpjekjet për të parandaluar përhapjen e variantit duhet të forcohen.

OBSH këshilloi që të përshpejtohet procesi i vaksinimit.

“Lajmi i mirë është se të dhënat tregojnë qartë se marrja e një serie të plotë vaksinimi ul ndjeshëm rrezikun e sëmundjes së rëndë dhe vdekjes”, u shpreh Hans Kluge, Drejtor Rajonal për Evropën në OBSH.