BE: 2 helikopterë për shuarjen e zjarreve nisen drejt Shqipërisë

Zjarret në pyje vazhdojnë të prekin rajone të ndryshme në Mesdhe dhe Ballkanin Perëndimor, ndërkohë Komisioni Evropian po mobilizon me shpejtësi mbështetje për të ndihmuar vendet në kufizimin e përhapjes së zjarreve dhe mbrojtjen e jetës dhe jetesës.

Theksohet se dy aeroplanë zjarrfikës Canadair nga Franca po dërgohen në zonat e prekura në Itali, për të filluar operacionet e shuarjes së zjarrit sot.

Po ashtu, dy avionë zjarrfikës nga Qipro po mbështesin Greqinë, në krye të një ekipi zjarrfikës për të mbështetur operacionet në terren.

Ndërkaq, përveç tyre, edhe dy helikopterë për të mbështetur operacionet në Shqipëri do të dërgohen nga Çekia dhe Holanda.

Përveç kësaj, Sllovenia po dërgon një ekip prej 45 zjarrfikësish në Maqedoninë e Veriut.

E gjithë ndihma mobilizohet përmes Mekanizmit të Mbrojtjes Civile të BE-së, me bashkëfinancim nga Komisioni të paktën 75 % të kostove të transportit.

Komisioneri për Menaxhimin e Krizave, Janez Lenarčič, tha: “Ne po punojmë gjatë gjithë kohës për të dërguar ndihmë, ndërsa zjarret janë ndezur në gjithë Evropën. Falënderoj Qipron, Çekinë, Francën, Slloveninë dhe Holandën që vendosën me shpejtësi aeroplanë zjarrfikës, helikopterë dhe një ekip zjarrfikësish për të mbështetur vendet e prekura shumë nga zjarret në pyje. Në këtë kohë ndërsa disa vende mesdhetare po përballen me zjarre, Mbrojtja Civile e BE -së sigurohet që mjetet tona të zjarrfikësve në vend të përdoren me kapacitet maksimal. Ky është një shembull i shkëlqyer i solidaritetit të BE-së në kohë nevoje“.