Asociacioni i Gazetarëve të Kosovës reagon ndaj deputetit Haki Abazi

Sipas raportimeve, deputeti i Vetëvendosjes, Haki Abazi, ka kërcënuar Baton Haxhiun dhe median e tij

Asociacioni i Gazetarëve të Kosovës ka dënuar ashpër kërcënimin e deputetit të Vetëvendosjes, Haki Abazi, ndaj “Albanian Post”.

“Asociacioni i Gazetarëve të Kosovës është thellësisht i shqetësuar për kërcënimin që deputeti i partisë politike në pushtet, Vetëvendosje, Haki Abazi, ka bërë ndaj mediumit ‘Albanian Post’, dhe drejtorit të tij, Baton Haxhiu”, thuhet në reagimin e AGK-së, transmeton Albinfo.ch.

“Albanian Post” e ka publikuar audio-incizimin në të cilin Abazi dëgjohet duke kërcënuar mediumin për shkak të raportimit të mëhershëm për dështimin e procesit për emërimin e ambasadorëve të rinj të Kosovës.

“Kërcënimi i hapur e me paramendim i deputetit ndaj gazetarëve është i papranueshëm dhe kontribuon në rrezikimin e sigurisë për kolegët tanë. Veprimi bëhet edhe më serioz për faktin që vjen nga një zyrtar i lartë i partisë që udhëheq Qeverinë dhe Kuvendin e Kosovës”, vazhdon tutje reagimi.

AGK-ja e fton partinë e Abazit, sikurse edhe institucionet shtetërore, të distancohen qartë nga gjuha kërcënuese e deputetit.

 

---