Shqipëri: 10 mijë nxënës më pak këtë vit shkollor

Mësuesit rrezikojnë vendin e punës në institucionet arsimore për shkak të rënies së numrit të regjistrimeve

Në Shqipëri janë regjistruar në klasë të parë vetëm 20 235 fëmijë, rreth 10 mijë fëmijë më pak se në vitin e shkuar shkollor.

“10 mijë fëmijë më pak do të thotë 350 klasa të para më pak, pra 350 mësues më pak të arsimit fillor. Ne para 5 viteve kemi pasur nga 6 klasa paralele, sot kemi 4. Ky problem ndihet e do të vazhdojë të ndihet edhe më shumë. Në Sauk, në shkollën ’28 Nëntori’, në shkollën time ku punoj ‘Marie Logoreci’ ka një klasë më pak”, tha Alma Lama, kryetare e Sindikatës së Arsimit në Tiranë, transmeton TCH, përcjell Albinfo.ch.

Në 20 vjetët e fundit, sipas të dhënave të INSTAT, popullata e fëmijëve të ciklit 9-vjeçar ka pësuar rënie me 48%.  Numri i ulët i regjistrimeve vihet re edhe në klasë të dhjetë, ku janë regjistruar 17 145 nxënës, 1.2% më pak se vitin e kaluar.

Risia e regjistrimeve këtë herë ishte aplikimi online përmes e-albania, e sipas Drejtorisë së përgjithshme të arsimit parauniversitar ende 0.2% e fëmijëve nuk janë regjistruar për shkak të disa problematikave, si pamundësia për të aplikuar apo prindërit nuk respektojnë juridiksionin e shkollave, ku u përket për arsimim dhe neglizhimi për t’i regjistruar në shkollat ku dëshirojnë.

 

---