Edi Rama: Nuk ka udhëtime biznes klas, as pushime jashtë shtetit

Në mbledhjen e parë me kabinetin qeveritar, kryeministri i Shqipërisë, Edi Rama, përmes një vendimi u kufizoi luksin ministrave të kabinetit të tij, transmeton Albinfo.ch.

Sipas kodit, anëtarët e qeverisë nuk duhet të udhëtojnë në biznes klas, as nuk mund të pushojnë jashtë shtetit apo të darkojnë dhe drekojnë në festa kur janë në orar të punës.

“Asnjë udhëtim pune jashtë shteti me lekët e shtetit në qendër apo rajone që nuk ka marrë miratim dhe nuk është njoftuar Ministria për Europën dhe Punët e Jashtme nuk konsiderohet në përputhje me etikën e qeverisë. Do parashikohen sanksione për çdo shkelje të normave etike. Shpenzimet e vizitave të punës jashtë shteti që nuk mbyllet me dorëzimin në ministri për raportin e vizitës nuk paguhet nga Thesari i shtetit”, tha Edi Rama, i cili sot edhe zyrtarisht nisi mandatin e tretë qeverisës në Shqipëri.