Serbët bllokojnë rrugën në Jarinje, Policia e Kosovës i fton të largohen

Situata në Jarinje, Vuçiq thërret në takim drejtuesit e ushtrisë serbe dhe të njësive speciale policore

Forca të shtuara të Njësisë Speciale të Kosovës janë vendosur sot në pikat kufitare me Serbinë në veri të vendit, për të mbikëqyrur zbatimin e marrëveshjes së reciprocitetit për targat.

Në pikën kufitare të Jarinjes, serbët janë grumbulluar dhe kanë bllokuar rrugën me kamionë.

Sipas një video të “KosovoOnline”, dëgjohet teksa një pjesëtar i Policisë së Kosovës u thotë serbëve që “protestën nuk ua ndalon askush, mirëpo rruga duhet të lirohet”.

Nga ana tjetër, pas situatës së krijuar, presidenti serb, Aleksandar Vuçiq, ka thirrur një seancë urgjente të Këshillit të Sigurisë Kombëtare për ditën e nesërme, duke filluar nga ora 10:00.

Mediat serbe shkruajnë se tema kryesore e këtij takimi do të jetë ngjarjet e fundit në Kosovë.

Si temë kryesore saktësisht do të jetë vendosja e reciprocitetit për targat, si dhe situata e krijuar në Jarinje.

Po ashtu është theksuar se Shefi i Shtabit të Përgjithshëm të Ushtrisë së Serbisë, Milan Mojsiloviq, si dhe krerët e të gjitha njësive speciale të forcave të armatosura serbe janë të ftuar në takimin e nesërm.

---