UNHCR u bën thirrje shteteve të BE-së të pranojnë refugjatë nga Afganistani

Vendet e BE-së nuk shpallën asnjë angazhim në këtë forum

Komisioni i Lartë i KB-së për Refugjatët (UNHCR) dëshiron që vendet e BE-së të presin 42 500 refugjatë afganë gjatë pesë vjetëve të ardhshme, tha sot eurokomisionerja Ylva Johansson.

Zyrtarja suedeze e vlerësoi këtë “një qëllim të arritshëm”, gjatë fjalës së saj në forumin e nivelit të lartë për mbrojtjen e shtetasve afganë në rrezik pas ardhjes në pushtet të talebanëve, ku janë mbledhur pjesëmarrës nga shumica e shteteve anëtare të Bashkimit Evropian, UNHCR-së dhe Organizatës Ndërkombëtare për Migracionin (IOM), raporton Afp, përcjell Albinfo.ch.

“Komisioneri i Lartë i KB-së për Refugjatët, Filippo Grandi, tha se gjatë pesë vjetëve të ardhshme rreth 85 000 afganë do të duhet të zhvendosen nga vendet fqinje me Afganistanin”, shpjegoi Johansson.

“Ai propozoi që Bashkimi Evropian të merrte gjysmën e tyre”, tha ajo.

“Unë mendoj se është e arritshme”, vazhdoi eurokomisionerja, ndërsa theksoi se “disa shtete anëtare nuk mund të marrin këtë lloj vendimi tani, sepse janë në procesin e formimit të një qeverie”, si Gjermania.

 

---