Kosovë: Punëtorët shëndetësorë, sërish sot në grevë

Federata Sindikale e Kosovës ka njoftuar se sot do të hyjnë në grevë punëtorët shëndetësorë. Sipas njoftimit të FSSHK-së, greva e punëtorëve shëndetësorë do të jetë 8-orëshe, ndërkaq shërbimet mjekësore do të jepen konform Ligjit mbi greva.

“Njoftojmë opinionin e gjerë se, përkundrejt pritjeve tona që të takohemi me institucionet shtetërore, kjo e fundit nuk ka reflektuar. Federata e Sindikatave të Shëndetësisë së Kosovës, si pasojë e mospërgjigjes nga ana e Qeverisë është e obliguar që më 02.12.2021, e enjte, të mbajë grevë 8 (tetë) orëshe pranë institucioneve shëndetësore. Këshilli Qendror Grevist siguron se të gjitha shërbimet emergjente do të jepen konform Ligjit mbi greva. Me këtë rast kërkojmë mirëkuptim nga ana e popullatës”, thuhet në njoftim.