Kosovë: Burri vret gruan, arrestohet nga Policia

Një grua ka mbetur e vrarë në Kosovë nga burri i saj i cili dyshohet se e ka qëlluar për vdekje

Ngjarja raportohet të ketë ndodhur në mesditën e sotme në fshatin Llaushë të Skenderajt, ku sipas dyshimeve të para, dorasi 51-vjeçari me iniciale S.Q. ka qëlluar për vdekje gruan e tij, 48-vjeçaren me iniciale L.Q.

“Nga hetimet fillestare nga vendi i ngjarjes bëhet e ditur se personi i dyshuar ka shtënë me armë zjarri në drejtim të gruas së tij L.Q., 48-vjeçare, e cila kishte pësuar lëndime të rënda, të njëjtën me urgjencë e kanë dërguar në Spitalin Rajonal në Mitrovicë. Ndërkohë nga autoritetet spitalore është raportuar se viktima si pasojë e plagëve kishte vdekur”, thuhet në njoftimin e Policisë, transmeton Albinfo.ch.

Dorasi S.Q., që dyshohet për veprën “Vrasje e rëndë”, është arrestuar derisa bëhet e ditur se është sekuestruar një armë e llojit pistoletë me tre fishekë, ndërsa në vendin e ngjarjes janë sekuestruar gjashtë gëzhoja.

---