Çmimi mesatar për m2 në Zvicër është rritur nga 6700 CHF në 7200 CHF

(KEYSTONE/Salvatore Di Nolfi)

Tregu zviceran i banesave vazhdon të rritet pa shenja dobësimi, raportoi RTS këtë javë.

Sipas platformës së pasurive të paluajtshme immoscout24, çmimi mesatar për m2 për një shtëpi familjare në Zvicër është rritur nga 6700 CHF në 7200 CHF gjatë 12 muajve të fundit, një rritje prej 7%. Çmimet e apartamenteve janë rritur edhe më shumë në disa vende, përcjell albinfo.ch.

Sipas Roxane Montagner, e cila punon për CiFi, një kompani që këshillon profesionistët e pasurive të paluajtshme, trendi nuk do të ndryshojë.

Për sa kohë që kërkesa tejkalon ofertën, çmimet do të vazhdojnë të rriten, tha ajo. Rregullat e rrepta që pengojnë ndërtimin në pjesën më të madhe të hapësirave të gjelbra të Zvicrës shtojnë mungesën e ndërtimeve të reja. Shndërrimi i zonave të gjelbra në tokë të ndërtimit është bërë gjithnjë e më i vështirë që kur votuesit zviceranë miratuan ligje për të kufizuar ndërtimet e reja në hapësirat e gjelbra.

Dy shtytës të tjerë të mëdhenj të bumit të fundit të çmimeve janë normat e ulëta historikisht të interesit dhe rritja e vazhdueshme e popullsisë së Zvicrës, përcjell tutje albinfo.ch.

Rreth 60,000 njerëz emigrojnë në Zvicër çdo vit. Normat e ulëta të interesit prej rreth 1% të fiksuara për 10 vjet e bëjnë zotërimin e një shtëpie shumë më të lirë se dhënia me qira, realitet për shumicën e banorëve, shumë prej të cilëve ndoshta nuk mund të përmbushin kurrë kërkesën e depozitës prej 20% për t’u kualifikuar për një hipotekë shtëpie.