Italia nis heqjen e kufizimeve anti-Covid

Italia po përgatitet për rihapjen e post Covid .

Infeksionet në shtetin Italian janë në rënie dhe tregojnë një situatë pandemike që është gjithnjë e më shumë nën kontroll. Hapi i parë do të jetë lamtumira ndaj detyrimit për përdorimin e maskave në ambiente jashtë, masë kjo e vendosur me dekretin e 13 tetorit 2020, pra 16 muaj më parë, kur Giuseppe Conte ishte ende kryeminister. Por pika vendimtare e kthesës do të jetë më 31 mars, kur gjendja e jashtëzakonshme do të përfundojë me një lehtësim të të gjitha kufizimeve të tjera, duke përfshirë lejen e gjelbër, përcjell albinfo.ch.

Përpara datës 31 mars është e mundur të hiqet detyrimi për të pasur leje të përforcuar për të gjitha ato aktivitete, të cilat parashikohet të zhvillohen në natyrë, nga restorantet te stadiumet, dhe ato në të cilat duhet “baza” , dyqane, shërbime personale, bankat, zyrat postare dhe zyrat publike. Hapi i dytë, që përkon me përfundimin e gjendjes së jashtëzakonshme, ka të bëjë me ambientet e brendshme, si kinematë, teatrot, muzetë, restorantet dhe mjetet lokale të transportit.

Po ashtu nga 10 marsi do të jetë e mundur për të vizituar sërish familjarët e shtruar në spital për 45 minuta në ditë, ndërsa kapacitetet e stadiumeve dhe sallave sportive do të rriten përkatësisht në 75% dhe 60% me synimin për t’i rihapur plotësisht 100% para përfundimit të sezonit.

Heqja e izolimit për pozitivët asimptomatikë mund të vendoset para datës 31 mars, sikurse ka bërë tashmë edhe Britania e Madhe.

 

---