A do të vendosë BE sanksione energjetike ndaj Rusisë?

pixabay

Sanksionet që mund të vendosen ndaj Rusisë nga Bashkimi Evropian nuk duhet të përfshijë importet e energjisë. Kështu u shpreh kryeministri italian Mario Draghi, të premten.
Draghi u tha gazetarëve se BE po studion opsione të ndryshme sanksionesh, nëse Rusia pushton Ukrainën.

“Ne po diskutojmë sanksionet me BE-në dhe gjatë këtyre diskutimeve kemi bërë të ditur qëndrimin tonë. Ato duhet të përqendrohen në sektorë të ngushtë, pa përfshirë energjinë”, u shpreh Draghi, transmeton Euronews, përcjell Albinfo.ch.

Italia importon 90 për qind të kërkesave të saj për gaz dhe furnizuesi i saj kryesor është Rusia.
Me intensifikimin e tensioneve mbi Ukrainën, Draghi tha se presidenti rus Putin kishte kërkuar ta takonte.

Gjithashtu, Draghi tha se shpreson në mundësinë e një takimi midis Putinit dhe udhëheqësit ukrainas, Volodymyr Zelenskiy.
Megjithëse Draghi tha se ishte e rëndësishme të shmangeshin sanksionet në sektorin e energjisë, ai shtoi se qeveria po shqyrtonte furnizime të tjera të mundshme me gaz.
Perëndimi ka paralajmëruar Rusinë se do të përballet me sanksione të ashpra në rast se pushton Ukrainën.