Macron dhe Putin bien dakord të ‘intensifikojnë’ përpjekjet diplomatike

Keystone

Emmanuel Macron dhe Vladimir Putin kanë rënë dakord të “intensifikojnë” përpjekjet diplomatike për të zgjidhur krizën në Ukrainë, ka thënë Kremlini të dielën pas një telefonate midis dy presidentëve.

Sipas mediave të huaja, përcjell Telegrafi, Pallati Elysée, i cili tha se Macron më pas foli me presidentin e Ukrainës, Volodymyr Zelenskyy, e kishte përshkruar më parë bisedën me Putinin si një përpjekje diplomatike të minutës së fundit për të shmangur një pushtim rus të Ukrainës.

Një gjë e tillë vjen pasi tensionet kanë arritur pikën e tyre më të lartë në disa vjet në Ukrainën lindore, mes një vale dhune gjatë fundjavës që ka rritur frikën në Perëndim se Rusia mund të kërkojë një pretekst për të pushtuar fqinjin e saj.

Ndërkohë ushtritë ruse dhe bjelloruse do të përfundonin stërvitjet e përbashkëta ushtarake në Bjellorusi të dielën.

Megjithatë, Minsk ka thënë se stërvitjet tani do të vazhdojnë për shkak të tensioneve të rënduara në Ukrainën fqinje.

Stërvitjet filluan më 10 shkurt, duke shtuar frikën perëndimore mbi qëllimet e Moskës, pavarësisht garancive të Putinit se stërvitjet ishin “thjesht mbrojtëse”.

Rusia ka grumbulluar rreth 150,000 trupa përgjatë kufirit ukrainas, por mohon se planifikon të pushtojë Ukrainën.