Ushtria ruse ka kontrollin e dy centraleve bërthamore të Ukrainës

Keystone

Mësohet se Rusia në mënyrë efektive ka në kontroll termocentralet bërthamore të Çernobilit dhe Zaporizhzhia, sipas Rafael Mariano Grossi, kreu i Agjencisë Ndërkombëtare të Energjisë Atomike, përcjell albinfo.ch.

Çernobili ishte vendi i fatkeqësisë më të keqe bërthamore në botë në vitin 1986. Forcat ruse morën kontrollin e tij javën e kaluar.

Centrali i Zaporizhzhia sapo ra nën kontrollin e Moskës dhe gjatë luftimeve, një predhë ruse goditi një ndërtesë brenda zonës, duke shkaktuar një zjarr.

Asnjë nga reaktorët nuk ishte afër dhe ata nuk u prekën. Zjarri është shuar dhe sistemet e monitorimit të rrezatimit janë plotësisht funksionale, transmeton rtv21.tv.

“Stafi ukrainas është ende në krye të operacioneve”, tha Grossi.

Grossi paralajmëroi se situata në Zaporizhzhia është “shumë e brishtë”.

Ai tha se ishte “e paprecedentë” të sulmohej një central bërthamor dhe operacionet ushtarake të zhvilloheshin aty pranë.