Gazetarja ruse rrezikon burgimin për protestën kundër luftës në Ukrainë

Youtube - sc

Gazetarja ruse, Marina Ovsianikova, e cila protestoi të hënën në mbrëmje në televizionin Pervii Canal (Canal 1), duke dalë me pankartë kundër luftës në Ukrainë, rrezikon 5 deri në 10 vjet burgim.

Në një reagim në rrjetet sociale ajo thotë se nuk pendohet dhe është krenare për veprimin e saj.

Ajo aktualisht ndodhet në arrest shtëpie, pasi fillimisht u arrestua dhe u mbajt në stacionin e policisë në Moskë.

Në disa postime në rrjetet sociale, të cilat nuk konfirmohen dot nëse janë bërë nga Marina Ovsianikova, ajo shkruan se nuk e di ccfarë do të ndodhë me të në të ardhmen.

“Avokati më tha se rrezikoj një dënim nga 5 deri në 10 vjet. Nuk pendohem për veprimin. Sidoqoftë, kam nevojë për mbështetjen tuaj”, shprehet  Ovsiannikova në Twitter.

Nuk është e qartë nëse këto postime në Twitter janë bërë vërtet nga Marina Ovsiannikova. Kjo llogari më vonë është fshirë.

Mediat polake shkruajnë se gazetarja më parë kishte regjistruar një video mesazh, ku thotë se babai i saj ishte nga Ukraina, kurse nëna ruse dhe bënte thirrje për protesta kundër luftës.

Gazetarja shprehet se ndihet e turpëruar për punën në televizion pasi i ka shërbyer propagandës së Kremlinit./Euronews