Rritet numri i zjarreve në pyje përderisa thatësira vazhdon në Zvicër

Kantoni jugor i Ticinos është goditur më së shumti nga zjarret pyjore, pasi thatësira që filloi në fillim të dhjetorit ka shtyrë disa rajone të rrisin nivelet e tyre të rrezikut nga zjarri, shkruan swissinfo.ch, përcjell albinfo.ch

Autoritetet në Centovalli në Ticino ishin në gjendje të vinin nën kontroll një zjarr të madh pyjor, pasi erërat u shuan të shtunën. Zjarri, i cili filloi katër ditë më parë, shkatërroi gjithsej 55 hektarë dhe detyroi evakuimin e 21 personave nga komuna e Verdasio. Dy shtëpi mbi fshat janë dëmtuar. Në kantonin Basel, reaguesit e parë arritën të parandalojnë përhapjen e një zjarri pyjor në Grellingen të premten. Indikacionet e para tregojnë se zjarri filloi në ‘dyshemenë’ e thatë të pyllit për shkak të aktivitetit njerëzor, të qëllimshëm ose të pakujdesshëm, tha policia.

Zjarrfikësit shuan një tjetër zjarr të premten, këtë herë në kantonin Vaud, ku u dogj gati një hektar pyll. Zjarri i madh në Centovalli është zjarri i tretë pyjor në Ticino këtë vit.

Autoritetet po i bëjnë thirrje popullatës që të shmangë ndezjen e zjarrit në pyll ose pranë tij dhe të mos hedhin bishtat e cigareve dhe shkrepset në ambient të hapur, përcjell tutje albinfo.ch.