7.1 milionë persona të zhvendosur brenda Ukrainës

Më shumë se 50% e familjeve të zhvendosura kanë fëmijë, 57% përfshijnë anëtarë të moshuar dhe 30% kanë njerëz me sëmundje kronike, sipas sondazhit

Mbi 7.1 milionë ukrainas janë të zhvendosur brenda vendit, të detyruar të largohen nga shtëpitë e tyre.

Në raportin e publikuar së fundmi nga Organizata Ndërkombëtare për Migracionin (IOM) njoftohet se ka një rritje prej 10% të numrit të personave të zhvendosur brenda vendit, përcjell Albinfo.ch.

“Korridoret humanitare nevojiten urgjentisht për të lejuar evakuimin e sigurt të civilëve dhe për të siguruar transportin dhe shpërndarjen e sigurt të ndihmave humanitare, shumë të nevojshme për të ndihmuar me shpejtësi të zhvendosurit brenda vendit”, tha drejtori i përgjithshëm i IOM-it, António Vitorino.

Me më shumë se 4.2 milionë refugjatë që janë larguar nga Ukraina për në vendet fqinje, sipas Komisionerit të Lartë të Kombeve të Bashkuara për Refugjatët, të paktën 11.3 milionë njerëz janë zhvendosur që nga fillimi i pushtimit rus në fund të shkurtit.

---