Serbia mohon se planifikoi vrasjen e Dick Martyt

Serbia i reagon Zvicrës

Sot, në një kundërpërgjigje, Agjencia Informative e Sigurisë e Serbisë, e njohur si “BIA”, ka mohuar të hënën të ketë planifikuar vrasjen e ish-senatorit zviceran, Dick Marty, përcjell albinfo.ch.

Nga ana tjetër, mediat në Zvicër kanë raportuar se Marty tash e një kohë të gjatë është nën masa të rrepta sigurie pasi vlerësohet se është i kërcënuar me jetë nga shërbimet inteligjente serbe, e që synonin t’ua hidhnin fajin shqiptarëve.

“BIA” i ka nisur të hënën letër Shërbimit Federal të Inteligjencës Zvicerane (FIS), ku sipas agjencisë “Tanjug”, ka dënuar “pretendimet dashakeqe për përfshirjen e shërbimeve të sigurisë serbe në planifikimin e vrasjes së dikujt”.

Sipas mediave zvicerane, serbët kishin planifikuar vrasjen e Martyt në mënyrë që fajin t’ua hidhnin shqiptarëve, me idenë se kjo mund të pranohej, meqë bazuar në pretendimet në raportin e zviceranit, u ngrit Gjykata Speciale në Hagë.

Agjencia “Tanjug” ka raportuar për këtë të hënën, por duke e marrë edhe një deklaratë të avokatit Goran Petronijeviq. E sipas tij, “dorëshkrimi përmes të cilit u kërcënua Marty, është vepër e britanikëve ose edhe e shqiptarëve”.

“Ky është dorëshkrim i MI-6 (Inteligjenca britanike), por nuk e përjashtoj mundësinë që është edhe i shërbimit inteligjent shqiptar”, tha avokati nga Beogradi për agjencinë serbe Tanjug.

 

---