Për herë të parë rusëve u konfiskohen prona të paluajtshme në Gjermani

Siç njoftoi të hënën prokurori publik i Mynihut I, janë konfiskuar tre apartamente private në kryeqytetin bavarez dhe llogaria për pagesat e qirave

Në Gjermani, së fundi janë konfiskuar për herë të parë pasuri të paluajtshme të rusëve në bazë të sanksioneve kundër Rusisë për shkak të agresionit në Ukrainë, shkruan agjencia gjermane e lajmeve, DPA.

Siç njoftoi të hënën prokurori publik i Mynihut I, janë konfiskuar tre apartamente private në kryeqytetin bavarez dhe llogaria për pagesat e qirave, transmeton albinfo.ch. Në këtë rast janë prekur një anëtar i Dumës Shtetërore Ruse, i identifikuar si L. nga zyra e prokurorit publik, dhe gruaja e tij, e cila është e regjistruar si banuese në Mynih, e identifikuar si K.

Një zëdhënëse e prokurorisë e cila ka bërë të ditur lajmin nuk ka dashur të japë informacione të mëtejshme për emrat e plotë të dy personave të prekur nga konfiskimi.

Prokurori publik është shprehur se ky ishte rasti i parë në Gjermani ku për shkak të sanksioneve jo vetëm janë “ngrirë” asetet, por realisht janë konfiskuar edhe pasuri të paluajtshme, përcjell albinfo.ch. Edhe pse nuk ka pasur raste të krahasueshme deri më sot dhe nuk ka praktikë gjyqësore, prokurori publik i Mynihut I beson se konfiskimi është i mundur.

---