Rreth 800 mijë vende pune në Gjermani mund të zhduken gjatë 15 viteve të ardhshme si pasojë e ndryshimeve strukturore në ekonomi, automatizimit dhe zhvillimit të inteligjencës artificiale. Ky është parashikimi i Agjencisë Federale të Punësimit, i cili paralajmëron transformime të rëndësishme në tregun gjerman të punës, përcjell albinfo.ch.
Megjithatë, humbja e vendeve ekzistuese të punës nuk nënkupton domosdoshmërisht zhdukjen e të njëjtit numër të mundësive të punësimit. Krahas profesioneve që mund të humbasin rëndësinë, pritet të krijohen edhe vende të reja pune, ndërsa punonjësit do të duhet të përshtatin aftësitë e tyre me kërkesat e reja.
Industria e automobilave ndër sektorët më të rrezikuar
Një nga sektorët që pritet të përjetojë ndryshime të mëdha është industria automobilistike gjermane.
Sipas vlerësimeve të Shoqatës së Industrisë së Automobilave në Gjermani, nga viti 2019 deri në vitin 2035 mund të humbin rreth 225 mijë vende pune në këtë sektor.
Ndër arsyet kryesore përmenden automatizimi i proceseve të prodhimit, kalimi drejt automjeteve elektrike dhe përdorimi gjithnjë e më i madh i teknologjive të avancuara.
Ndryshime dhe shkurtime të vendeve të punës priten edhe në industrinë kimike, sektorin financiar, aviacion dhe telekomunikacion.
Këto profesione mund të preken më shumë
Veçanërisht të ekspozuara ndaj automatizimit janë profesionet që përfshijnë detyra të përsëritura, përpunim të të dhënave dhe procese që mund të kryhen përmes sistemeve digjitale.
Ndër fushat dhe profesionet që mund të pësojnë ndryshime të mëdha janë:
-
Punëtorët në industrinë e automobilave: veçanërisht ata që punojnë në montim dhe linjat e prodhimit.
-
Nëpunësit administrativë: përpunimi i dokumenteve, regjistrimi i të dhënave dhe detyrat rutinore mund të automatizohen.
-
Kontabilistët dhe punonjësit financiarë: llogaritjet, raportet dhe dokumentacioni financiar mund të kryhen gjithnjë e më shumë nga sistemet inteligjente.
-
Punëtorët në fabrikat industriale: robotët dhe makinat e automatizuara mund të zëvendësojnë disa procese manuale.
-
Dizajnerët grafikë: programet e inteligjencës artificiale po ndryshojnë mënyrën e krijimit të materialeve vizuale.
-
Punonjësit në telekomunikacion: shërbimi ndaj klientëve dhe mbështetja teknike po kalojnë gjithnjë e më shumë drejt automatizimit.
-
Punonjësit në aviacion dhe industrinë kimike: digjitalizimi dhe automatizimi mund të ndryshojnë proceset administrative dhe të prodhimit.
Megjithatë, kjo nuk do të thotë se të gjitha këto profesione do të zhduken. Në shumë raste, do të ndryshojë mënyra e ushtrimit të tyre dhe do të kërkohen njohuri e aftësi të reja.
Vetëm një në pesë punonjës është i kënaqur me punën
Përveç pasigurisë që sjell automatizimi, Gjermania përballet edhe me një tjetër problem në tregun e punës: pakënaqësinë profesionale.
Një raport mbi mirëqenien, i realizuar nga Universiteti i Oksfordit, tregon se vetëm një në pesë punonjës në Gjermani është i kënaqur me punën që bën, ndërsa katër në pesë do të preferonin të ushtronin një profesion tjetër.
Përballë këtyre zhvillimeve, këshilltarja e karrierës Lena Haubold-Fromherz rekomandon që personat që mendojnë të ndryshojnë profesion fillimisht të analizojnë aftësitë, interesat dhe mundësitë e tyre.
Sipas saj, nuk është gjithmonë e nevojshme të braktiset profesioni aktual dhe të fillohet një karrierë krejtësisht e re. Në shumë raste, përvetësimi i njohurive të reja dhe aftësimi për përdorimin e teknologjive moderne mund të jenë të mjaftueshme.
Si shembull, ajo përmend dizajnerët grafikë, të cilët në vend që të largohen nga profesioni për shkak të konkurrencës së inteligjencës artificiale, mund të mësojnë t’i përdorin këto mjete në kombinim me përvojën e tyre profesionale.
Ndryshimi i profesionit, megjithatë, mund të sjellë edhe pasoja financiare, pasi kalimi në një sektor të ri shpesh nënkupton fillimin nga e para dhe mundësinë e një page më të ulët.
“Një plan B është gjithmonë përparësi”, thekson këshilltarja e karrierës.
Sipas televizionit publik gjerman ARD, zhvillimi i inteligjencës artificiale po e bën gjithnjë e më të domosdoshëm aftësimin e vazhdueshëm dhe përshtatjen me teknologjitë e reja, në mënyrë që punonjësit të ruajnë konkurrueshmërinë në tregun e punës./DW/Albinfo.ch
