Bie nataliteti në Shqipëri, popullsia po tkurret

Në tremujorin e dytë 2022, sipas të dhënave të fundit, lindën 5400 bebe, ose 15% më pak se vitin e kaluar.

Në Shqipëri ka rënie të natalitetit. Gratë po lindin gjithmonë e më pak fëmijë dhe kjo po e çon shtimim natyrore në nivelet më të ulëta. Sipas kësaj, i bie që çiftet nuk po zëvendësojnë vetveten.

Në tremujorin e dytë 2022, sipas të dhënave të fundit, lindën 5400 bebe, ose 15% më pak se vitin e kaluar, raporton Albinfo.ch.

Me këtë ecuri, në vitin 2022 një grua lind mesatarisht 1.32 fëmijë dhe që popullsia të mos tkurret, duhet që norma e lindshmërisë të jetë 2.1 fëmijë për grua. Për herë të fundit kjo normë u regjistrua 20 vjet më parë.

Rënie të popullatës në periudhën prill-qershor kanë shënuar 8 nga 12 qarqe ku numri i vdekjeve ka qenë më i madh se lindjet. Në Tiranë, Durrës, Dibër e Kukës shtesa natyrore është pozitive.

Shqipëria prej 30 vitesh po ecën në këtë rrugëtim të humbjes së popullsisë, dhe përveç lindshmërisë, faktorë të tjerë që po shkretojnë vendin janë edhe emigrimi e plakja./Albinfo.ch/

---