VMRO-ja zyrtarizon nismën për referendum kundër marrëveshjes me Bullgarinë

EPA/VALDRIN XHEMAJ

Partia opozitare maqedonase VMRO-DPMNE ka njoftuar të martën fillimin e procedurës për organizimin e referendumit të detyrueshëm me qëllim të anulimit të marrëveshjes me Bullgarinë.

Kjo marrëveshje e propozuar nga Franca dhe e miratuar në Parlamentet e Maqedonisë së Veriut dhe Bullgarisë, i hapi rrugën shtetit maqedonas që të nisë bisedimet për anëtarësim në Bashkimin Evropian, më 19 korrik.

Në bazë të marrëveshjes, Shkupi gjatë procesit të bisedimeve me BE-në duhet të zgjidhë çështjet e hapura lidhur me aspektet historike, ndërsa ato për gjuhën dhe identitetin beson se nuk do të jenë pjesë e bisedimeve.

Çështja kryesore ka të bëjë me përfshirjen e pakicës bullgare në Kushtetutën e Maqedonisë së Veriut, si popull shtetformues.

Opozita maqedonase marrëveshjen e quan “tradhti kombëtare”, andaj edhe ka iniciuar referendumin me pyetjen: “A jeni për anulimin e Marrëveshjes me Bullgarinë?”.

“Me këtë marrëveshje mohohet gjuha, identiteti dhe historia maqedonase. Kjo nismë për referendum është tërësisht evropiane, sepse kundërshton politikat dhe veprimet negative që Bullgaria i drejton ndaj Maqedonisë në aspektin gjuhësor, kulturës dhe identitetit”, ka deklaruar Nikolla Micevski, kryetar i grupit parlamentar të VMRO DPMNE-së./REL