Erdogan kritikon Perëndimin për luftën në Ukrainë

Vendet perëndimore po provokojnë luftën Rusi-Ukrainë përmes dërgesave të armëve, ndër të tjera, deklaroi sot presidenti turk, Recep Tayyip Erdogan.

“Perëndimi po ndjek një politikë të bazuar në provokim… Thuhet se armët po dërgohen; ata po dërgojnë të gjithë skrapin që kanë në Ukrainë”, u tha Erdogan gazetarëve në Beograd, pa përmendur asnjë vend.

“Nuk mund të arrish rezultate përderisa përpiqesh të mbash një luftë të tillë me provokime”, tha ai gjatë një konference të përbashkët për shtyp me presidentin serb, Aleksandar Vuçiq, transmeton dpa.

Udhëheqësi turk akuzoi më tej se gabimi i Evropës ishte nënvlerësimi i Rusisë, që do të thotë se Europa është fajtore për krizën e saj energjetike.

“Në një kohë që të gjithë po e sulmojnë, Rusia do të përdorë mjetet dhe armët që ka”, shtoi Erdogan, duke iu referuar ndërprerjeve të furnizimit me gaz rus.