Kosova në mesin e 18 vendeve që do të marrin ndihmë financiare ushtarake nga SHBA

(AP Photo/Matt Rourke)

Sekretari amerikan i Shtetit, Antony Blinken vizitoi sot Kievin teksa premtoi ndihmë të re për sigurinë e shtetit ukrainas, e cila kap vlerën prej dy miliardë dollarëve (eurove).

Vizita e dytë e zyrtarit amerikan në kryeqytetin ukrainas që nga pushtimi rus i shkurtit vjen pasi Ukraina raportoi përparim në përpjekjet e saj për të rimarrë territorin e pushtuar nga Rusia pranë qytetit të dytë më të madh të Ukrainës, Kharkiv.

Blinken njoftoi paketën e re ushtarake prej 2.2 miliardë dollarësh (euroshe) për Ukrainën dhe 18 vende të tjera që konsiderohen në rrezik të agresionit të ardhshëm rus. Përafërsisht 1 miliard dollarë do t’i ndahen Ukrainës, tha një zyrtar.

Pjesa tjetër do të ndahet midis Kosovës, Shqipërisë, Bosnjë dhe Hercegovinës, Bullgarisë, Kroacisë, Republikës Çeke, Estonisë, Gjeorgjisë, Greqisë, Letonisë, Lituanisë, Moldavisë, Malit të Zi, Maqedonisë së Veriut, Polonisë, Rumanisë, Sllovakisë dhe Sllovenisë.

Paratë synojnë të mbrojnë sovranitetin, të modernizojnë forcat e sigurisë, të përmirësojnë partneritetet me aleancën ushtarake transatlantike NATO-n dhe të forcojnë kapacitetin “për të kundërshtuar ndikimin dhe agresionin rus”, tha një zyrtar amerikan.

Ndihma vjen në formën e granteve dhe huave të SHBA-së që u mundësojnë vendeve të blejnë armë dhe pajisje mbrojtëse të prodhuara në Shtetet e Bashkuara.

Ndërkohë, Blinken duke takuar presidentin ukrainas, Volodymyr Zelensky tha se vizita e tij erdhi në një “moment kyç” për Ukrainën, duke vënë në dukje se kundërofensiva po tregonte rezultate pozitive.

Zelensky tha se Ukraina ishte mirënjohëse për “mbështetjen e madhe” të Shteteve të Bashkuara, të cilat ai tha se po ndihmonin Ukrainën “të kthejë territorin dhe tokat tona”. /Reuters