Skip to content

Kurti dhe ambasadorja zvicerane marrin pjesë në samitin rajonal kundër diskriminimit ndaj komuniteteve

Në samitin dyditor, që po mbahet më 18 dhe 19 nëntor, përfaqësues institucionalë, organizata dhe aktivistë nga rajoni diskutojnë për barazinë, përfshirjen sociale dhe luftimin e diskriminimit.

Në Prishtinë ka nisur Samiti Rajonal për Luftimin e Diskriminimit Racor ndaj komuniteteve rom, ashkali dhe egjiptian, i cili synon të forcojë bashkëpunimin institucional dhe të avancojë politikat për trajtim të barabartë dhe përfshirje sociale, përcjell albinfo.ch.

Samiti, që po mbahet më 18 dhe 19 nëntor 2026, zhvillohet nën temën “Nga Zotimet tek Ndikimi i Qëndrueshëm: Politika, Institucionalizim dhe Llogaridhënie për Përfshirje të Barabartë”. Në të marrin pjesë përfaqësues institucionalë, organizata të shoqërisë civile, ekspertë, aktivistë dhe përfaqësues të komuniteteve nga Kosova dhe vendet e rajonit.

Në hapjen e samitit morën pjesë kryeministri i Kosovës, Albin Kurti, ambasadorja e Zvicrës në Kosovë, Anne-Lise Cattin Hennin, drejtori i Zyrës për Qeverisje të Mirë në kuadër të Zyrës së Kryeministrit, Habit Hajredini, shefi i Zyrës së Terre des hommes në Kosovë, Pajtim Zeqiri, si dhe drejtori ekzekutiv i Roma Versitas Kosova, Avni Mustafa.

Kryeministri Kurti theksoi gatishmërinë e Qeverisë për të luftuar diskriminimin racor, duke nënvizuar se përfshirja e komuniteteve është çështje e të drejtave të qytetarëve dhe përgjegjësi e shtetit. Ai tha se barazia duhet të zbatohet në praktikë përmes politikave dhe masave konkrete, veçanërisht në arsim, punësim dhe banim.

“Asnjë fëmijë nuk duhet ta ketë të ardhmen e kufizuar për shkak të rrethanave në të cilat ka lindur ose jeton”, deklaroi Kurti.

Ndërkaq, Habit Hajredini theksoi rëndësinë e bashkëpunimit ndërmjet institucioneve qendrore dhe lokale, fuqizimit të mekanizmave për mbrojtjen nga diskriminimi dhe partneritetit me organizatat e shoqërisë civile.

Ai veçoi edhe zbatimin e Strategjisë së re për avancimin e të drejtave të komuniteteve rom, ashkali dhe egjiptian për periudhën 2027–2031.

Ambasadorja zvicerane, Anne-Lise Cattin Hennin, riafirmoi përkushtimin e Zvicrës në luftimin e diskriminimit racor, veçanërisht ndaj komuniteteve të margjinalizuara në Ballkanin Perëndimor. Ajo u bëri thirrje institucioneve dhe partnerëve zhvillimorë që perspektivat dhe rekomandimet e vetë komuniteteve t’i shndërrojnë në veprime konkrete.

Në anën tjetër, Pajtim Zeqiri vlerësoi kontributin e dhënë gjatë shtatë viteve të zbatimit të projektit nga konsorciumi, duke veçuar krijimin dhe fuqizimin e mekanizmave kundër diskriminimit, bashkëpunimin me institucionet dhe mbështetjen për organizatat e shoqërisë civile.

Ai theksoi nevojën që mekanizmat dhe modelet e krijuara të vazhdojnë të funksionojnë dhe të përvetësohen nga institucionet.

Drejtori ekzekutiv i Roma Versitas Kosova, Avni Mustafa, vuri në pah rëndësinë e trajtimit të komuniteteve rom, ashkali dhe egjiptian si pjesëmarrës të barabartë në shoqëri. Ai theksoi se këto komunitete nuk kërkojnë trajtim të veçantë, por mundësi të barabarta, respekt për identitetin dhe mbrojtje të të drejtave themelore.

Gjatë ditës së parë, diskutimet u përqendruan në përvojat e përfshirjes së këtyre komuniteteve në Ballkanin Perëndimor, rolin e medias në përfaqësimin e tyre dhe raportimin etik, si dhe mundësitë për punësim, fuqizim ekonomik dhe përfshirje në arsim.

Në kuadër të samitit po trajtohen gjithashtu roli i artit dhe kulturës në dialogun ndërkulturor, mekanizmat për raportimin dhe reagimin ndaj diskriminimit, si dhe rëndësia e investimeve publike dhe institucionalizimit të politikave për përfshirje të qëndrueshme.

Samiti organizohet nën udhëheqjen e Zyrës së Kryeministrit të Kosovës, me mbështetjen e Terre des hommes në Kosovë, Zërit të Romëve, Ashkalive dhe Egjiptianëve dhe Fondacionit HEKS, në kuadër të projektit “Drejtësia Sociale për Romët, Ashkalitë dhe Egjiptianët”, i financuar nga Agjencia Zvicerane për Zhvillim dhe Bashkëpunim (SDC)./Albinfo.ch