1 në 10 pacientë në Zvicër pësojnë dëmtime gjatë qëndrimit në spital

Midis tetë dhe 15 për qind e pacientëve gjithashtu përjetojnë reaksione të padëshiruara nga barnat gjatë qëndrimit të tyre në spital

Njerëzit në Zvicër gëzojnë trajtim të mirë mjekësor – ky është një pohim shabllon që përsëritet vazhdimisht. Por jo gjithçka është kaq e ndritshme, shkruan gazeta në gjuhën frënge “Le Matin Dimanche”, duke cituar një studim të kryer së fundi në një spital zviceran.

Sipas këtij studimi, një në dhjetë pacientë pëson ndonjë dëmtim gjatë një trajtimi mjekësor, transmeton albinfo.ch. Pothuajse gjysma e këtyre rasteve do të mund të shmangeshin.

Midis tetë dhe 15 për qind e pacientëve gjithashtu përjetojnë reaksione të padëshiruara nga barnat gjatë qëndrimit të tyre në spital. Sipas mbikëqyrësit të çmimeve, Stefan Meierhans, “ju paguani çmimin e një Porsche ndërsa merrni një VW”.

Kjo mund të thuhet duke ditur se  zvicerani renditet i dyti në botë për sa i përket kostos që paguan për shëndetësi, pas Shteteve të Bashkuara të Amerikës.

“Kjo është e kuptueshme, sepse ne duam të kemi mjekësinë kulminante”, shton ai, përcjell albinfo.ch. “Por pikërisht këtu qëndron problemi: mjekësia e shkallës më të lartë duhet të financohet dhe jo gabimet në sistem”, siç ka konstatuar edhe studimi i përmendur.

---