Zgjedhjet presidenciale në Austri: Van der Bellen, favorit për të fituar edhe një mandat

Shtatë kandidatë garojnë më 9 tetor për t’u zgjedhur president i Austrisë. Sipas sondazheve të fundit në Austri, presidenti aktual, Alexander Van der Bellen, mund të fitojë që në raundin e parë.

Të dielën, më shumë se 6 milionë austriakë do të shfrytëzojnë të drejtën e tyre për të votuar për presidentin e ri federal të Austrisë.

Pavarësisht numrit rekord prej shtatë kandidatësh, gjasat janë shumë të mëdha që presidenti i ri të vendoset që në raundin e parë. E për t’u zgjidhur president me raundin e parë, kandidati duhet t’i fitojë më shumë se 50 për qind të votave.

Sondazhet tregojnë se presidenti aktual, Alexander Va nder Bellen, edhe pse është 78-vjeçar, mund ta fitojë këtë garë që në raundin e parë, pa pasur nevojë të shkojë në balotazh. Në sondazhet e fundit kanë parashikuar një rezultat mes 51 dhe 59 për qind për Van der Bellen, shkruan der Standard, përcjell albinfo.at.

Mandati i Presidentit Federal është gjashtë vjet.

Përveç  favoritit kryesor për presindet, Van der Bellen, në garë janë edhe gjashtë persona të tjerë, të cilët do të “luftojnë” deri në ditën e fundit për postin më të lartë të shtetit austriak: Michael Brunner (MFG), Gerald Grosz (I pavarur), Walter Rosenkranz (FPÖ), Heinrich Staudinger (I pavarur), Tassilo Wallentin (I pavarur) dhe Dominik Wlazny (Partia e birrës).

Të drejtë vote do të kanë të gjithë ata që kanë mbi 16 vjeçe dhe që posedojnë nënshtetësi austriake.

Ndryshe, në gjithë Austrinë, rreth 18 për qind (apo rreth 1.4 milionë) e popullsisë rezidente mbi moshën 16 vjeçe nuk kanë nënshtetësi austriake, pra një në gjashtë persona të moshës së lejuar për të votuar, njofton albinfo.at.

Shifrat e publikuara nga „Statistik Austria“ muaj me parë patën ngjallur debat pro dhe kundër reformës për lehtësimin e marrjes së nënshtetësisë austriake. Në maj të këtij viti presidenti aktual, Alexander Van der Bellen, pati propozuar që të këtë lehtësime të marrjes së nënshtetësisë. Por ky propozim u kundërshtua nga partia kryesore qeveritare ÖVP dhe partia e ekstremit të djathtë, FPÖ. Disa politikanë dhe analistë këtë iniciativë të presidentit e patën quajtur një ide për fushatë elektorale.

---