Mërgimtari 20-vjeçar shqiptar humb jetën në aksidentin tragjik

@pixabay

Policia italiane raporton për një aksident tragjik ka ndodhur në Itali, ku ka humbur jetën një 20-vjeçar shqiptar, përcjell albinfo.ch.

Përplasja ndodhi në orën 08:50 në rrugën provinciale midis Terno d’Isola dhe Carvico, pranë parkut Camandellino, mes një makine dhe një motoçiklete. Viktima është 20-vjeçari Kevin Mustafa, një ish-teknik shqiptar në Brembo.

Sipas gjetjeve të para, motoçiklisti u përplas me një makinë që ishte duke ecur në drejtim të kundërt. Përplasja e rëndë bëri që të thyhej helmeta.

I riu ndërroi jetë pak minuta më vonë, pak para se të vinte urgjenca e dërguar në vendngjarje nga policia lokale e Ternos dhe karabinierët. Rruga provinciale në atë pikë mbeti e bllokuar deri pas mesditës, me radhë të gjata edhe në rrugën që të çon nga Presezzo në qytet.

“Djali ra shumë keq, iu thye helmeta”, tha shoferi i një kamioni, i cili ishte dëshmitar i aksidentit.

“Unë zbrita menjëherë për ta ndihmuar atë dhe pesë-gjashtë persona të tjerë gjithashtu. Nuk e prekëm, sepse qafa e tij ishte në një pozitë të keqe dhe kishim frikë se mos i përkeqësonim gjërat, por telefonuam 118. Ai po merrte ende frymë, edhe pse me shumë gulçim”.