KE me çmim kufizues për gazin

(KEYSTONE/Christian Beutler)

Komisioni Evropian ka propozuar më në fund një çmim kufizues për gazin, edhe pse kjo kërkon shumë masa sigurie.

Kufizimi do të nisë zbatimin automatikisht kur çmimi për kontratat afatgjata të arrijë 275 euro për megavat/orë, gjë që është masa e parë duke qenë se çmimi është shumë i lartë.

Masa e dytë është që ai të aplikohet vetëm nëse çmimi qëndron në këtë shifër për 14 ditë dhe nëse diferenca mes çmimeve evropiane dhe atyre globale bëhet shumë e theksuar.

Dhe masa e tretë është se ai do të çaktivizohet menjëherë në rast se shqetëson tregun. Sidoqoftë, bëhet fjalë për një mekanizëm të paprecedent që KE e mbron.

“Kjo nuk është një ndërhyrje rregullatore për të vendosur çmimin në treg në një nivel artificialisht të ulët. Është një mekanizëm që do të aplikohet për të parandaluar dhe zgjidhë rastet e çmimeve të larta që nuk janë në linjë me trendin global të çmimeve”, thotë Kadri Simson, komisionere e BE për Energjinë.

Mekanizmi do të funksionojë në platformën lider të Evropës ku kryhen transaksionet e gazit. Por kjo ndërhyrje në treg mund të ngjasojë më tepër me një ndërhyrje kozmetike sesa me një ndërhyrje reale për qytetarët dhe kompanitë.

Niveli kufizuese është aq i lartë sa nuk duhet të ishte aktivizuar kurrë në të kaluarën. As edhe gjatë muajit gusht, kur çmimet në Evropë prekën nivele rekord. Ndaj, ky propozim mund të mos jetë i mjaftueshëm.

“Çmimi i gazit duhet të ishte caktuar shumë kohë më parë bashkë me çmimin kufizues, me një kuotë për konsumatorët shtëpiakë, por edhe për zanatçinjtë dhe bizneset e vogla e të mesme, në mënyrë që të kenë siguri gjatë dimrit. Asnjë nga këto nuk mjafton dhe të them të drejtën, lëvizja e Komisionit është zhgënjyese”, shprehet Martin Schirdewan, eurodeputet.

Ministrat e Energjisë do ta diskutojnë çështjen të enjten dhe një betejë e madhe pritet mes atyre që duan një ndërhyrje më të fortë në treg, të cilët janë shumicë dhe atyre që janë kundër, si Gjermania dhe Holanda./Euronews