Zbulohet ilaçi kundër Alzhajmerit, vonon me 5 muaj degradimin e trurit

Një ilaç eksperimental kundër Alzhajmerit ngadalësoi për herë të parë progresin e kësaj sëmundjeje që prek trurin. Studiuesit nuk mund të parashikojnë ende efektet e këtij zbulimi tek cilësia e jetës së pacientit, por zbulimi shihet si një shpresë e re pas zhgënjimeve të vazhdueshme për një trajtim më dinjitoz.

“Rezultatet e proceseve klinike treguan se ilaçi “Lecanemab” ngadalësoi avancimin e sëmundjes. Dhe ne besojmë se kjo u jep shpresë pacientëve dhe mjekëve, stimulon më tepër kërkimet për Alzhajmerin dhe sëmundjet nervore”, shprehet Dr. Michael Irizarry, specialist.

Rreth 1.800 persona në fazat e para të sëmundjes morën pjesë në studim. Ilaçi vonoi përkeqësimin e gjendjes së pacientëve me rreth 5 muaj.

“E kuptojmë se kjo nuk është një kurë dhe po përpiqemi të kuptojmë se çfarë do të thotë të ngadalësosh Alzhajmerin, pasi është hera e parë”, thekson Maria Carrillo.

Në Shtetet e Bashkuara, Administrata për Ushqimin dhe Medikamentet po shqyrton përshpejtimin e aprovimit të “Lecanemab”. Vendimi mund të merret në fillim të janarit.

Thuajse të gjitha mjekimet ekzistuese për miliona pacientë me Alzhajmer në mbarë botën vetëm sa lehtësojnë simptomat./Euronews