Kompania e njohur e shitjes me pakicë Lidl po ndërton dyqanin e saj më të madh në Gjermani, në qytetin Rheinfelden, në landin e Baden-Württembergut, pranë kufirit me Zvicrën. Sipas kompanisë, objekti i ri pritet të hapet në pranverën e vitit 2027.
Dyqani po ndërtohet në rrugën Güterstrasse 18, në afërsi të pikës doganore me Zvicrën. Objekti do të shtrihet në disa kate dhe do të ketë një hapësirë të madhe parkimi në katin përdhes, si dhe 40 vende të dedikuara për biçikleta.
Në katin e sipërm do të vendoset njësia tregtare e quajtur “Metropol”, e cila do të ofrojë një hapësirë të gjerë për blerje. Sipas projektit, interieri do të karakterizohet nga hapësira të hapura dhe përdorimi i elementeve të drurit, me synimin për të krijuar një ambient më të ngrohtë për konsumatorët.
Blerësit zviceranë, një treg i rëndësishëm
Lokacioni i përzgjedhur nuk është i rastësishëm. Qytetet gjermane përgjatë kufirit me Zvicrën, përfshirë Konstanzin, Jestettenin, Rheinfeldenin, Weil am Rheinin dhe Lörrachun, janë destinacione të frekuentuara nga konsumatorët zviceranë që udhëtojnë për të blerë produkte me çmime më të ulëta.
Sipas një studimi të Universitetit të St. Gallenit, më shumë se 70 për qind e konsumatorëve zviceranë bëjnë rregullisht blerje jashtë vendit. Fluksi i blerësve është veçanërisht i madh gjatë ditëve të premte dhe të shtuna.
Dallimet në çmime ndërmjet dy vendeve janë një nga arsyet kryesore të këtij fenomeni. Në një krahasim të publikuar në tetor, gazeta zvicerane “Blick” kishte evidentuar dallime të konsiderueshme ndërmjet çmimeve të produkteve në një filial të Lidl-it në jug të Badenit dhe një tjetri në qytetin e Cyrihut.
Lidl Zvicër nuk pret humbje të konsumatorëve
Pavarësisht hapjes së filialit të ri pranë kufirit, Lidl Zvicër nuk shpreh shqetësim për mundësinë e humbjes së klientëve në favor të tregut gjerman.
“Ne nuk kemi frikë nga humbja e klientëve, veçanërisht pasi nuk operojmë me filialin tonë në afërsi të drejtpërdrejtë të këtij lokacioni”, ka deklaruar Sandro Kissayi, zëdhënës i Lidl Zvicër.
Ai ka theksuar se kompania po shënon rritje të konsiderueshme në Zvicër, si në qarkullim ashtu edhe në pjesën e tregut.
“Gjithnjë e më shumë klientë po na vizitojnë më shpesh dhe po i kryejnë të gjitha blerjet e tyre javore tek ne”, ka deklaruar Kissayi.
Sa u përket dallimeve të çmimeve ndërmjet Zvicrës dhe Gjermanisë, zëdhënësi ka thënë se ato lidhen me kushtet e ndryshme të tregut dhe standardet e ofertës së produkteve, prandaj të dy tregjet nuk mund të krahasohen drejtpërdrejt.
Sipas tij, prioritet i Lidl Zvicër mbetet ofrimi i çmimeve më të ulëta në krahasim me operatorët e tjerë të tregut zviceran.
Ndërtimi i filialit të ri në Rheinfelden pritet të forcojë më tej ofertën tregtare në zonën kufitare, e cila tashmë është një nga destinacionet kryesore të blerjeve për konsumatorët nga Zvicra.