Aeroporti i Cyrihut rrit mbi dyfish numrin e pasagjerëve në vitin 2022

Megjithatë, ky numër është ende më i ulët krahasuar me vitin para Koronës (2019), gjegjësisht arrin në 72 për qind të totalit të vitit të përmendur

Në vitin 2022 aeroporti i Cyrihut ka rritur më shumë se dyfish numrin e pasagjerëve në krahasim me një vit më parë, transmeton albinfo.ch. Gjithsej 22.6 milionë pasagjerë kanë fluturuar përmes aeroportit më të madh të Zvicrës vitin e kaluar, pas 10.2 milionë pasagjerëve në vitin 2021.

Pas një tremujori të parë, i cili ende karakterizohej nga pandemia e koronës, numri i pasagjerëve në aeroportin e Cyrihut u rikuperua ndjeshëm gjatë vitit, ka njoftuar aeroporti të enjten.

Numri i pasagjerëve në gjysmën e parë të vitit u rrit nga 15,000 në disa raste në 90,000 në ditët e pikut.

Edhe pse numrat e pasagjerëve i kanë tejkaluar parashikimet, ata ishin ende nën vitet para pandemisë së koronës. Kështu, krahasuar me vitin para Koronës (2019), numri i pasagjerëve vitin e kaluar arrinte në 72 për qind.

Numri i fluturimeve gjatë vitit 2022 ishte 216.584, që korrespondonte me një rritje prej 63 për qind. Megjithatë krahasuar me vitin 2019, numri i fluturimeve ishte 79 për qind, përcjell albinfo.ch. Gjithsej 422,153 tonë mallra janë trajtuar në aeroportin e Cyrihut në vitin 2022. Kjo paraqet një rritje prej 7 për qind krahasuar me një vit më parë.

---