Produktet kosovare u promovuan suksesshëm në Panairin “Food Expo” në Greqi

Bëhet e ditur se kompanitë nga Kosova: Euro Fruti, A-D-E Group, Frutex, AbI&Elif 19, Camel, Newco Minex L.L.C, Egi Group, Fresh-C.O, i promovuan produktet e tyre në Panairin ndërkombëtar të ushqimit dhe pijeve “FOOD EXPO”, që u zhvillua në Athinë të Greqisë, nga data 18 deri 20 mars 2023, shkruan albinfo.ch.

Hapësirën ekspozuese për paraqitjen e kompanive nga Kosova në këtë panair e ka siguruar MINT/KIESA.

Pjesëmarrës të shumtë në këtë panair vizituan shtandin e Kosovës, me ç’rast u njoftuan nga afër me produktet e kompanive kosovare.

Shtandin e Kosovës e ka vizituar edhe personi përgjegjës nga Zyra ekonomike dhe tregtare e Kosovës në Athinë, Fitim Gllareva, si dhe përfaqësues të shoqatave: Mjedra e Kosovës, Organika dhe Pepeko.

Përfaqësues të MINT dhe KIESA-s së bashku me kompanitë kosovare kanë zhvilluar takime të shumta me pjesëmarrës në këtë panair. Njëherësh janë shpërndarë edhe materiale promovuese të KIESA-s rreth sektorëve potencialë dhe mundësive për investime në Kosovë.

Vlen të theksohet se Food Expo është panair që grumbullon një numër prej 32,000 vizitorësh nga rreth 40 shtete të botës, ku kompanitë prezantojnë produktet e tyre nga sektori i ushqimit dhe pijeve.