Greqi: Rrëzohet avioni zjarrfikës, vdesin dy pilotë

TV ERT

Një avion që po shuante zjarret në Greqi është rrëzuar në mesditë në ishullin grek të Evias.

Avioni grek Canadair kishte të paktën dy persona në bord kur u rrëzua pranë fshatit Platanisto, shkruan DW.

Avioni ishte mes të paktën tre avionëve të tjerë dhe rreth njëqind zjarrfikësve që po luftonin me flakët në Evia.

Ministria e Mbrojtjes e Greqisë tha se dy pilotët, fati i të cilëve fillimisht ishte i paqartë, ishin anëtarë të Forcave Ajrore Greke, përcjell albinfo.ch.

Transmetuesi shtetëror TV ERT transmetoi një video të avionit që fluturonte ulët teksa u rrëzua.

Kryeministri grek Kyriakos Mitsotakis paralajmëroi se kohë të vështira ishin përpara ndërsa ministrat u takuan për të diskutuar një përgjigje ndaj zjarreve.

“Ne kemi një verë tjetër të vështirë përpara nesh. Të gjithë ne jemi në roje. Përballë asaj që po përballet i gjithë planeti, veçanërisht Mesdheu, i cili është një pikë e nxehtë e ndryshimeve klimatike, nuk ka asnjë mekanizëm magjik mbrojtës, nëse do të kishte, ne do ta kishim zbatuar atë”, tha Mitsotakis, përcjell albinfo.ch.

Ka rreth një javë që Greqia përballet me zjarret e shumta në ishujt e saj, që shpërthyen dhe u përhapën për shkak të temperaturave të larta.